Resolución de 14 de abril de 2011, de la Conseyería de Cultura y Turismu, pola que s’aprueba la convocatoria conxunta de subvenciones pa la normalización social del asturianu y, nel so ámbitu, del gallego-asturianu, en réxime de concurrencia competitiva. [Cód. 2011-08771]
| Sección | Otras Disposiciones |
| Rango de Ley | Resolución |
L’Estatutu d’Autonomía del Principáu d’Asturies y la Llei 1/98, de 23 de marzu, d’Usu y Promoción del Bable/Asturianu señalen como competencia del Principáu’l fomentu y la protección del asturianu nes sos distintes variedaes que, en cuantes que modalidaes llingüístiques, s’usen nel territoriu del Principáu d’Asturies, mesmo que del gallego-asturianu nel so ámbitu. De magar l’aprobación d’esta normativa, el Principáu d’Asturies asumió la dirección, coordinación y execución de les actividaes rellacionaes col asturianu y vien estableciendo midíes específiques de promoción del mesmu, respetando siempre los principios de llibertá y voluntariedá nel so usu pola ciudadanía. Ente estes midíes ta la de la convocatoria de subvenciones o ayudes que permitan fomentar l’usu del asturianu y del gallego-asturianu n’iniciatives particulares, empresariales o asociatives y, en xeneral, como vehículu d’espresión cultural.
A tal efectu la Dirección Xeneral de Política Llingüística de la Conseyería de Cultura y Turismu formuló la oportuna propuesta definitoria de les distintes llinies subvencionables pa la normalización social del asturianu y, nel so ámbitu, del gallego-asturianu.
Buscando llograr esti oxetivu, por Resolución d’esta Conseyería de 30 d’abril de 2009 (BOPA de 13 de mayu de 2009) aprobáronse les correspondientes bases rectores, procediendo agora a l’aprobación de la convocatoria correspondiente al exerciciu 2011.
P’atender a la presente convocatoria pública de subvenciones, el Conseyu de Gobiernu, en xunta de 13 de abril de 2011 autorizó un gastu de 579.600 € con cargu a les aplicaciones presupuestaries 1402.422R.472.000 (57.600,00 €), 1402.422R.472.001 (40.500,00 €), 1402.422R.472.011 (22.500,00 €), 1402.422R.472.012 (373.500,00 €), 1402.422R.482.050 (85.500,00 €), del presupuestu de gastos en vigor.
Vistos:
— Llei del Principáu d’Asturies 6/1984, de 5 de xunetu, del Presidente y del Conseyu de Gobiernu.
— Decretu 34/2008, de 26 de payares, de Reestructuración de les Conseyeríes qu’integren la Comunidá Autónoma.
— Decretu Llexislativu 2/1998, de 25 de xunu, pol que s’aprueba’l Testu Refundíu del Réxime Económicu y Presupuestariu del Principáu d’Asturies.
— Decretu 71/1992, de 26 d’ochobre, sobre réxime xeneral de concesión de subvenciones.
— Llei 2/1995, de 13 de marzu, sobre Réxime Xurídicu de l’Alministración del Principáu d’Asturies.
— Llei 38/2003, de 17 de payares, Xeneral de Subvenciones.
— Real Decretu 887/2006, de 21 de xunetu, pol que s’aprueba’l Reglamentu de la Llei 38/2003, de 17 de payares, Xeneral de Subvenciones.
Atendiendo a lo anteriormente espuesto,
Resuelvo
Primeru.—Aprobar la convocatoria conxunta de subvenciones pa la normalización social del asturianu, y nel so ámbitu, del gallego-asturianu, en réxime de concurrencia competitiva, demientres l’exerciciu 2011.
Segundu.—Van ser beneficiaries d’estes ayudes les persones o entidaes que s’indiquen pa caúna de les llinies, y van poder ser oxetu de subvención les actuaciones que se desenvuelvan conforme col detalle que s’indica de siguío:
— Llinia 1: Estudios fechos en o sobre l’asturianu o’l gallego-asturianu:
Van poder acoyese a estes ayudes investigadores, individualmente o en grupu, asturianos o que faigan vida de contino nel Principáu d’Asturies, que realicen demientres l’añu 2011 estudios en o sobre l’asturianu o’l gallego-asturianu. Tán escluyíes d’esta convocatoria les persones o estudios que se puedan acoyer a otres ayudes d’ésta u otres Conseyeríes por tener convocatoria específica.
L’oxetu de la presente convocatoria ye la concesión d’ayudes económiques en réxime de concurrencia competitiva destinaes pa estudios que, tratando dalgún tema d’interés, tean redactaos n’asturianu o en gallego-asturianu; o bien a estudios que traten del asturianu o gallego-asturianu nes sos dimensiones llingüística, lliteraria, sociollingüística, musical o cultural en xeneral, independientemente de la llingua na que tean redactaos.
Nun van ser subvencionables los gastos xeneraos por equipamientu o inversión.
La cantidá máxima de la subvención por proyectu va ser de 6.000 euros.
— Llinia 3: Actividaes d’asociaciones y otres entidaes sin propósitu d’interés económicu pa la normalización social del asturianu y, nel so ámbitu, del gallego-asturianu:
Van poder solicitar estes subvenciones les asociaciones y otres entidaes sin propósitu d’interés económicu d’ámbitu asturianu, constituyíes llegalmente y qu’acrediten la inscripción nel rexistru llegal correspondiente, que promuevan actividaes en defensa, promoción o fomentu del asturianu y/o del gallego-asturianu.
Cuando se trate d’una asociación tien de tar inscrita nel Rexistru d’Asociaciones al amparu del artículu 10 de la Llei Orgánica 1/2002, de 22 de marzu, reguladora del Drechu d’Asociación. Por ello queden escluyíos d’esta convocatoria los partíos políticos, los sindicatos y les organizaciones empresariales; les ilesies, confesiones y comunidaes relixoses; les federaciones deportives y les asociaciones de consumidores y usuarios que, según l’artículu 1.3 de la llei mentada, van mandase pola so llexislación específica.
Tamién queden escluyíes d’esta convocatoria les entidaes o actividaes que se puedan acoyer a otres ayudes d’ésta o otres Conseyeríes por tener convocatoria específica.
L’oxetivu de la presente convocatoria ye la concesión d’ayudes económiques en réxime de concurrencia competitiva pal desarrollu d’actividaes específiques d’asociaciones y otres entidaes sin propósitu d’interés económicu, llegalmente constituyíes, que realicen actividaes de defensa, promoción o fomentu del asturianu y, nel so ámbitu, del gallego-asturianu demientres l’añu 2011.
Nun van ser subvencionables los gastos xeneraos por equipamientu o inversión, nin tampoco aquellos orixinaos polos conceptos de dietes, manutención o atenciones protocolaries nin la dedicación de los integrantes de la entidá a l’actividá subvencionada.
La cuantía máxima de la subvención por proyectu va ser de 4.000 euros.
— Llinia 4: Actividaes d’empreses privaes pa la normalización social del asturianu y, nel so ámbitu, del gallego-asturianu:
Van poder solicitar estes subvenciones toles empreses privaes d’ámbitu asturianu y aquelles comunidaes de bienes que, anque un tengan personalidá xurídica, desenvuelvan proyectos, actividaes o comportamientos que supongan un impulsu del usu de la llingua asturiana nel so ámbitu d’actuación. Queden escluyíes d’esta convocatoria les entidaes o actividaes que se puedan acoyer a otres ayudes d’ésta u otres Conseyeríes por tener convocatoria específica.
L’oxetu de la presente convocatoria ye la concesión d’ayudes económiques en réxime de concurrencia competitiva a les empreses privaes qu’empleguen l’asturianu y, nel so ámbitu, el gallego-asturianu, en tou tipu d’actividaes empresariales, pero especialmente naquelles que van dirixíes al públicu realizaes nel añu 2011 y basaes nel usu normal y dignu de la llingua asturiana.
Nun van ser subvencionables los gastos xeneraos por equipamientu o inversión a nun ser que se trate d’elementos necesarios y completamente xustificaos pola naturaleza de l’actividá subvencionada.
La cuantía máxima de la subvención por proyectu va ser de 6.000 euros.
— Llinia 5: Promoción d’actividaes cinematográfiques y de videu n’asturianu o gallego-asturianu
Va poder solicitar estes subvenciones cualesquier empresa privada d’ámbitu asturianu dedicada a la producción cinematográfica y de videu. Tán escluyíes d’esta convocatoria les empreses o actividaes que se puedan acoyer a otres ayudes d’ésta o otres Conseyeríes por tener convocatoria específica.
L’oxetu de la presente convocatoria ye la concesión d’ayudes económiques en réxime de concurrencia competitiva pa empreses privaes destinaes a la realización demientres l’añu 2011 d’actividaes cinematográfiques y de videu de tipu creativu, nes que l’usu del asturianu y, nel so ámbitu, del gallego-asturianu, impliquen la normalización y dignificación social, faciendo posible la creación d’un fondu audiovisual en llingua asturiana.
Queden escluyíes aquelles producciones que nun incorporen de forma espresa l’usu predominante del asturianu de manera vehicular normal (diálogos, voz n’off, créditos, etc.), lo mesmo que les obres que contengan esclusivamente música, como nel casu de los videu-clips de canciones.
Nun van ser subvencionables los gastos xeneraos por equipamientu o inversión.
La cuantía máxima de la subvención por proyectu va ser de 8.000 euros.
— Llinia 6: Promoción de la música n’asturianu y en gallego-asturianu
Va poder solicitar estes subvenciones cualesquier empresa privada d’ámbitu asturianu dedicada a la producción musical. Tán escluyíes d’esta convocatoria les entidaes o actividaes que se puedan acoyer a otres ayudes d’ésta o otres Conseyeríes por tener convocatoria específica.
L’oxetu de la presente convocatoria ye la concesión d’ayudes económiques en réxime de concurrencia competitiva a empreses privaes pa la promoción de la música n’asturianu y, nel so ámbitu, en gallego-asturianu, que se realice en diferentes soportes físicos o dixitales demientres l’añu 2011. A los fines de la normalización social, l’asturianu o, nel so casu, el gallego-asturianu, deberá ser la llingua normal y vehicular na qu’apaezan les lletres de les canciones y tolos testos impresos o dixitales qu’acompañen a la obra musical.
Nun van ser subvencionables los gastos xeneraos por equipamientu o inversión.
La cantidá máxima de la subvención por proyectu va ser de 5.000 euros.
— Llinia 7: Actividaes de medios de comunicación pa la normalización social del asturianu y, nel so ámbitu, del gallego-asturianu:
Van poder solicitar estes subvenciones les empreses titulares de medios de comunicación d’ámbitu asturianu. Tán escluyíes d’esta convocatoria les entidaes o actividaes que puedan acoyese a otres ayudes d’ésta o otres Conseyeríes por tener convocatoria específica.
L’oxetu de la presente convocatoria ye la concesión d’ayudes económiques en réxime de concurrencia...
Para continuar leyendo
Solicita tu prueba